敬畏上主ê靈修生活

敬畏上主ê靈修生活

黃春生

《Kui年kah Jimmy Carter做伙靈修》推薦序

靈修to̍h是「敬畏上主」ê操練，真歡喜看tio̍h《Kui年kah Jimmy Carter做伙靈修》chit本冊ê出版。Jimmy Carter做一位總統，伊無掠家己已經有ê權勢做誇口，反tńg是用謙卑、敬畏上主來帶領伊人生頭前ê路。Jimmy Carter ê一生非常精彩，m̄-koh伊siōng看重ê職務是甚麼？Jimmy Carter bat án-ne講過：「Tī我chē-chē ê職務中間，若是ài人人kan-taⁿ記tiâu我所做過ê一件tāi-chì，請會記得，我是聖經主日學老師。」

Jimmy Carter tùi細漢to̍h tòe老父tī農場做工，伊一生lóng深深有留農民戇直、質樸ê個性，有早期清教徒ê信仰態度。Jimmy Carter從軍七年，為tio̍h老父過身，伊tùi海軍退役，tńg去故鄉。伊tùi老父ê手頭承接兩項工作，第一項是農場，第二項是教會ê主日學。Jimmy Carter是一位優秀ê主日學老師，伊對靈修、對《聖經》有執訣（koat）/mî-nōa ê追求。無論伊有gōa無閒，伊每禮拜日一定beh去伊自細漢to̍h teh聚會ê「主koh來浸信教會」(Maranatha Baptist Church）擔任聖經主日學教員。甚至tī伊擔任參議員，kah 1971年擔任喬治亞州州長ê時，mā是繼續tī教會擔任聖經主日學教師。伊tī州長就職演講中宣布：「種族歧視ê時代一去無koh倒tńg來à」，伊tī保守ê南方，kā馬丁路德．金恩ê肖像掛tī州議會大廳裡，而且宣布錄用烏人參政，展現基督包容ê疼。

1976年，Jimmy Carter參加競選美國總統。參選前，伊只不過是一个美國南部小州ê州長，根本都無全國的知名度。伊tī大、小場ê競選會頂面，一開嘴to̍h講：「我叫Jimmy Carter，是一位重生得救ê基督徒。」「重生得救」chit-ê詞tī Jimmy Carter使用了後，就開始tī全美國，甚至tī全世界流行起來。宗教信仰tī現代真chē美國人看起來，是一件私人領域ê tāi-chì，無適合the̍h來公開ê場合談論，若是用tī政治宣傳ê時，恐驚會引起反感，soah來失去選票。總是，Jimmy Carter堅信主耶穌所講ê話：「我kā lín講，tī人ê面前承認我ê，人子tī上帝ê天使面前mā會kā伊承認。」(路加福音12:8)。Jimmy Carter認為準講是競選失敗，mā beh tī人ê面前認主耶穌是基督。

1977年tī宣誓就任美國總統ê時，Jimmy Carter手hōaⁿ華盛頓總統所留落來ê聖經，宣佈伊beh謙卑tī上主ê指引之下做好總統ê職分。伊引用彌迦書6章8節：「世間人，祂bat指示你啥物是好。上主ài你做啥物？獨獨ài你行公義，心存憐憫、謙卑，來kah你ê上帝做伙行。」通過chit段經文來告白伊所領受ê呼召。

Tī擔任總統ê期間，伊mā繼續tī華盛頓ê教會講道、擔任主日學教師，伊ê敬虔kah謙卑是咱真súi ê信仰典範，這lóng是出tī伊敬畏上主ê靈修生活。Tī chia我beh ǹg tāi-ke推薦《Kui年kah Jimmy Carter做伙靈修》chit本冊，chit本冊有約翰．加爾文靈修ê款式，to̍h是通過對聖經經文ê詮釋、理解，了後koh藉tio̍h所領受ê成做祈禱。Ǹg望通過chit本冊，mā ē-tàng hō͘ 今日ê台灣人用家己ê母語來靈修，過敬畏上主ê靈修生活。

敬畏上主是智慧ê根本，bat hit位至聖ê人to̍h是聰明。(箴言9:10）