漢羅濫寫：寫出台灣家己 ê 語言

 ⭕️ 漢羅濫寫：寫出台灣家己 ê 語言

「漢羅濫寫」（Hàn-lô-lām-siá）就是漢字 kap 羅馬字做伙寫。對台語來講，尤其是漢字 kap 白話字（Pe̍h-ōe-jī, POJ）自然透濫，照台語家己 ê 語法、聲音 kap 思考方式來書寫。

寫台文 ê 時，透濫一、兩句 POJ，khòaⁿ kú--ah，慢慢仔就會熟似 Hàn-lô-lām-siá ê 好處。看愈久、寫愈慣勢，就會發現：原來台語毋免逐字攏揣一个漢字來套，mā 毋免先 tī 頭殼內翻做華語，才閣寫出來。

漢羅濫寫上重要 ê 意義，就是 hō͘ 台語照家己 ê 款式來寫。

台語有真濟詞、語氣 kap 聲音，用 POJ 寫出來顛倒閣較直接。像 ê、kap、mā、tī、hō͘、tùi、beh、ē-tàng、m̄-koh，看久自然就會熟似。這毋是漢字寫袂出來才「借」羅馬字；POJ 本身就是台灣已經使用百外冬 ê 文字傳統。

所以，Hàn-lô-lām-siá ê 目的毋是 beh 排斥漢字，而是 beh 拒絕「只有全漢字才算正式文字」ê 中國中心想像。

漢字 ē-sái 用，POJ mā ē-sái 用；啥物方式上適合台語，咱就用啥物方式。

看愈久，就愈熟似；寫愈濟，就愈自然。

當咱毋免逐句經過華語 ê 思考方式，才有法度寫家己 ê 語言，咱就開始建立台灣家己 ê 文字主體性。

用台語思考，用漢羅書寫。毋是拒絕世界，是用台灣家己 ê 聲，行入世界。