成人洗禮程序

 台灣基督長老教會成人洗禮程序 (台語漢字)

宣布：「咱得著幫贊是靠上主的名；伊是天地的創造主！」(詩篇124:8)

所疼的兄弟姊妹！請注意來聽主耶稣基督吩咐的話。祂對死人中復活了後，猶未上天的代先，有講：「天頂地下的權已經攏總互我。所以，恁着去招萬百姓來做學生，給個行洗禮，互個歸佇父、子、聖神的名。見若我所有命令恁的，着教示個守，閣我日日及恁佇啲，到世間的路尾。」（太28:18-20）

佇五旬節，彼得傳福音的時，對聽伊的人有講：「恁着反悔，逐人佇耶穌基督的名受洗禮，到互恁的罪赦免，閣欲受聖神的賞賜；因為所應允的歸佇恁及恁的子孫，以及攏總遠遠的人，就是見若主一咱的上帝所欲召的。」（徒2:38-39）

呼召：（牧師對欲受洗禮的人講：）

親像彼時（hit-sî）彼得叫人反悔信耶穌基督，閣受洗禮，今（taⁿ）我亦按呢對你（恁）講：「你（恁）着深信，你（恁）若真實反悔，告白（kò-pe̍h）你（恁）的信仰，閣佇祂的名來受洗禮，此個聖禮典就欲成做你（恁）的罪得着洗清氣的記號及印證，閣表明對聖神得着重頭生來結連佇基督。」

今你（恁）欲受洗禮，你（恁）着佇上帝及眾人的面前告白你（恁）的信仰來應答我所欲問的。

誓約：

1.問：你（恁）有信上帝做你（恁）的天父，耶穌基督做你（恁）的救主，聖神做你（恁）的保惠師抑無？

答：有。

2.問：你（恁）有誠實反悔你（恁）的罪，也信靠耶穌基督救贖的功勞抑無？

答：有。

3. 問：你（恁）着倚靠上帝的恩典，盡力服事祂，一世人行他的道路，盡信徒的本份。你（恁）有決意欲按呢抑無？

答：有。

（行洗禮的時通互會眾起立。欲受洗禮的人也通佇台前，牧師就用水滴佇伊（個）的頭殼頂講：）

OOO我用水給你行洗禮互你歸佇父、子、聖神上帝的名。阿們。

（洗禮了後，牧師着講：）

「願平安的上帝家己互你（恁）一盡成聖！閣願你（恁）的神及魂以及身軀，佇咱的主耶穌基督閣來的時，攏得着保全，無通嫌！」（帖前五23）

宣告：（牧師攑手對受洗禮的人講：）

你（恁）已經告白你（恁）的信仰來受洗，我倚靠教會的頭，咱的主耶穌基督的名，及奉台灣基督長老教會以及OO小會的權柄接納你（恁）做陪餐會員，有份佇主的桌，及新的約的恩典。

祈禱：全能慈悲的上帝！阮感謝祢即呢大（chiah-nih tōa）的恩典，用此個聖禮典接納祢的子兒入祢的教會，願祢祝福伊（亻因）。求祢用聖神降落佇伊（亻因）頂面來堅固伊（亻因），也用恩典賞賜伊（亻因），互伊（亻因）結連佇基督得着主的充滿，永遠佇祢的內面。抵（tú）着試探的時保護伊（亻因），互伊（亻因）會爭戰信仰的好爭戰。願祢的氣力扶持伊（亻因）的軟弱，保守伊（亻因）安穩佇祢的疼，閣互伊（亻因）會一世人服事祢。

阮的主上帝！求祢互阮逐人對今仔日參加此個聖禮典了後，會閣卡明白洗禮的意義。求祢赦免阮，因為離開祢的道路，致到阮虧欠領受洗禮的恩惠。求祢互阮會完全反悔，導阮倒轉來歸佇祢，對今（taⁿ）了後會做祢盡忠的奴僕。

阮按呢祈禱是奉主耶穌基督的名，阿們。

接納：（牧師、長老握手歡迎及接納受洗禮者）

歡迎：（紹介、會眾拍掌歡迎）